Kryeministri Albin Kurti ka bërë thirrje që procesi i inervistimit të kandidatëve për kryeprokuror të shtetit të jetë I drejtë, transparent dhe meritor, duke thënë se qytetarët kanë nevojë për një kryeprokuror me intergritet të lartë moral dhe profesional.

“Sot zhvillohet intervistimi i kandidatëve për kryeprokuror të shtetit.
Ky proces është tejet i rëndësishëm për Republikën e Kosovës, për qytetarët dhe shtetin e së drejtës, prandaj ka vëmendjen e të gjithëve.
Kosova dhe qytetarët kanë nevojë që të zgjidhet një kryeprokuror që ka intergritet të lartë moral dhe profesional por edhe që është i guximshëm, punëtor e energjik.
Krimi i organizuar, korrupsioni i lartë dhe çdo lloj kriminaliteti duhen luftuar kudo e tërë kohën. Drejtësia nevojitet për dinjitetin dhe mirëqenien e qytetarit por edhe për sigurinë tonë shtetërore e kombëtare.
Si kryeministër i vendit pres që ky proces të jetë i drejtë, transparent dhe meritor”, ka shkruar Kurti në një postim në facebook.

Kujtojmë se në garë për kryeprokurorë të shtetit janë gjashtë prokurorë: Armend Hamiti, Prokuror në Prokurorinë Themelore të Prishtinës; Blerim Isufaj, Kryeprokuror në Prokurorinë Speciale të Republikës së Kosovës; Kujtim Munishi, Kryeprokuror në Prokurorinë Themelore të Prishtinës; Lulzim Sulejmani, Prokuror në Zyrën e Kryeprokurorit të Shtetit; Shqipdon Fazliu, Prokuror në Zyrën e Kryeprokurorit të Shtetit.​

Intervistimi i tyre do të bëhet sot nga Paneli Vlerësues./arbresh.info/