Shteti i Francës ka dhuruar për Kosovën 117 mijë doza të vaksinës kundër COVID-19. Dozat e vaksinës janë nga kompania farmaceutike Pfizer.

Këtë e bëri të ditur presidentja Vjosa Osmani, e cila, në emër të qytetarëve, e falënderoi presidentin dhe popullin francez për donacionin.

“Angazhimi ynë institucional për luftimin e pandemisë është fuqizuar vazhdimisht përmes përkrahjes së partnerëve e aleatëve tanë”, shkroi presidentja në një postim në Facebook.

“Franca, dhe njëherë përgjatë këtij rrugëtimi sfidues, u dëshmua si një vend mik e solidar”, u shpreh tutje Osmani, transmeton Klankosova.tv.

“Kosova ka arritur një nivel të mirë të vaksinimit dhe qytetarët tanë kanë treguar nivel të lartë të përgjegjësisë kolektive e vetëdijesimit. Por, kemi ende punë përpara. Siç u dëshmua në vende të tjera, doza e tretë është e domosdoshme për ta parandaluar një valë të re infektimesh”.

“Në prag të festave të fundvitit, dhurata më e mirë që mund t’i bëni vetes dhe më të dashurve tuaj është ruajtja e shëndetit tuaj. Andaj, ju lutem, vaksinohuni!”, përfundoi presidentja.