Një burrë nga Karolina e Veriut, i dënuar gabimisht për vrasje dhe i burgosur për 26 vjet, i është dhënë falje e plotë nga guvernatori.

Dontae Sharpe kishte luftuar për të provuar pafajësinë e tij që nga arrestimi i tij në vitin 1994. Ai doli nga burgu në gusht të vitit 2019, shkruan BBC, transmeton portal arbresh.info

“Emri i familjes sime është pastruar,” u tha ai gazetarëve të premten.

Lajmi vjen pas një dokumentari të BBC-së mbi dështimin e drejtësisë në rastin e tij.

Guvernatori Roy Cooper tha në një deklaratë duke shpallur faljen se ai e kishte shqyrtuar me kujdes rastin dhe ata që janë dënuar gabimisht si Sharpe “meritojnë që kjo padrejtësi të njihet plotësisht dhe publikisht”.

Me faljen e plotë, Sharpe do të mund të paraqesë një kërkesë për dëmshpërblim nga shteti.

“Liria ime ende nuk është e plotë për sa kohë ka njerëz që janë gabimisht në burg, të dënuar gabimisht dhe njerëz që presin falje”, tha ai.

“Unë kam qenë atje dhe e di se sa njerëz të pafajshëm janë aty, të cilët e dinë se sistemi ynë është i korruptuar dhe duhet ndryshuar”, shtoi ai.

Sharpe u dënua me një akuzë për vrasje të shkallës së parë për vrasjen e George Radcliffe. Muaj pas gjyqit, një dëshmitare okulare adoleshente e shtetit hoqi dorë nga dëshmia e saj.

U deshën mbi dy dekada që ai të shfajsohej dhe të lirohej nga burgu./arbresh.info/