Një laborator në Britani të Madhe është mbyllur, pasi dyshiohet se 43 mijë njerëz mund të kenë marrë rezultate të pasakta mbi testin e koronavirusit.

Autoritetet kanë nisur një hetim në një laborator në Wolverhampton, pas raporteve të rezultateve negative të testit të PCR, pasi individët më parë ishin testuar pozitivë për një test të shpejtë të antigjenit, transmeton portal arbresh.info

Sipas udhëzimeve zyrtare në Britani të Madhe, testet PCR janë më të sakta se testet e shpejta të antigjenit dhe individët mund të dalin nga izolimi nëse janë negativë në një test PCR dhe më parë kanë qenë pozitivë në një test të shpejtë të antigjenit.

Autoritetet vlerësojnë se 43 mijë njerëz kanë marrë rezultate negative të testit PCR, kryesisht në jug-perëndim të Anglisë, ndoshta duke nënvlerësuar numrin e të infektuarve nga Covid-19 midis 8 shtatorit dhe 12 tetorit.

Klinika Shëndetësore Immensa, pronare e laboratorit, tha se ishte “duke bashkëpunuar plotësisht” me autoritetet për hetim.

Autoritetet theksojnë se ky është një incident i izoluar në një laborator dhe se mostrat tani po ridrejtohen në laboratorë të tjerë./arbresh.info/