Vërshimet në Preshevë, 82 shtëpi e biznese të dëmtuara, hapet xhirollogaria për ndihmë

22:00 | 2 Qershor 2021
Përparim Bublaku

Kryetarja e Preshevës, Ardita Sinani ka bërë të ditur se deri më tani janë evidentuar 82 shtëpi e biznese të dëmtuara nga vërshimet e fundit.

Ajo përmes një postimi në Facebook ka njoftuar se është hapur një xhirollogari për të gjithë ata që duanë t’i ndihmojnë të dëmtuarit.

Postimi i plotë i saj:

Komisioni komunal ka evidentuar deri tash 82 shtëpi dhe biznese të dëmtuara nga vërshimet e fundit në Komunën e Preshevës. Procesi vazhdon deri në evidentimin e plotë për çdo pronë.

Gjatë mbledhjes së sotme të Shtabit për situata të jashtëzakonshme, si kryesuese e Shtabit, inicova hapjen e një xhirollogarie të veçantë devizore me status publik, për personat juridik e fizik brenda dhe jashtë vendit, të cilët duan të kontribuojnë në sanimin e dëmeve të shkaktuara.

Kjo xhirollogari transparente do të bëhet publike sapo të hapet nga organet përgjegjëse.