Nga rreth pesë mijë testime në Laboratorin e Mikrobiologjisë Molekulare me metodën RT-PCR që bëheshin në Institutin Kombëtarë të Shëndetit Publik tani ka rënë në mesatarisht tre mijë teste.

Zvogëlimi i testimeve për rastet e dyshuara me COVID19 po vlerësohet se po paraqet rrjedhimisht edhe numër më të vogël të infektuarve, por situata vazhdon të mbetet shqetësuese.

Kryetari i Asociacionit të Komunave të Kosovës, Sazan Ibrahimi,  vlerëson se masat për mbylljen e disa bizneseve dhe kufizimi i lëvizjes kanë ndikuar në uljen e rasteve.

“Mendoj që ky ka qenë një vendim i mirë pasi që ka ndiku në uljen e rasteve me COVID-19, ka edhe nga ato komuna të cilat nuk kanë rrezikshmëri të lartë mirëpo sidoqoftë kjo është diçka e mirë për shëndetin por që për ekonominë është e rëndë, por parësore mbetet shëndeti”, thotë Ibrahimi.

Por, deputeti nga radhët e PDK-së, Bekim Haxhiu, vlerëson se çështja me testet është e qëllimshme.

Sipas tij, Kosova ka komuna që se ka asnjë rast, ndërsa ka komuna që kanë nga dy tri raste e janë mbyllur krejt, e që është një gabim total.

“Nga 5502 testime sa ishin tri ditë më parë, sot janë prezantuar vetëm 3208 teste, respektivisht  numrin i testimeve është zvogëluar  për 42%, apo 2294 më pak testime. Pandemia nuk mposhtet duke zvogëluar numrin e  testimeve, por duke rritur numrin e vaksinimeve me vaksinën anti-COVID-19”, deklaron Haxhiu për arbresh.info.

Sipas raporteve të përditshme të IKShPK-së vërehet rënie e testimeve.

Derisa më 8 prill ishin marrë 5502 mostra, ky numër ka shkuar duke u zvogëluar deri në 3208 më 12 prill.

Numri i përgjithshëm i të infektuarve që nga fillimi i pandemisë po i afrohet shifrës prej 100 mijë vetave, në Kosovë vazhdojnë të jenë mbi 13 mijë raste aktive./S.Dedushi/arbresh.info/