Kryetari i partisë ‘Zgjidhja’, Koço Kokëdhima, e cilësoi një manovër dinake elektorale të Rilindjes marrëveshjen mes qeverisë dhe 870 naftëtarëve të Ballshit për t’u dhënë për një vit nga 40 mijë lekë ndihmë ekonomike.

Ai u bëri thirrje naftëtarëve që t’i marrin paratë, por të mos gënjehen nga kocka që u hodhi qeveria dhe të luftojnë me vendosmëri e deri në fund politikanët dhe qeveritarët e korruptuar të Shqipërisë.

Reagimi i Kokëdhimës

Marrëveshja mes qeverisë dhe 870 naftëtarëve të Ballshit për t’u dhënë për një vit nga 40 mijë lekë ndihmë ekonomike, është një manovër dinake elektorale e Rilindjes.

Naftëtarët le t’i marrin paratë, sepse janë gjaku dhe djersa e tyre dhe me to duhen paguar borxhet e bukës së përditshme në defterët e dyqaneve, por ajo është një kockë që u jepet për t’u marrë votat, si më parë.

Sjellja e qeverive ndaj naftës dhe qindra njerëzve që e kanë lidhur jetën me të është kriminale. Ato lejuan që dhjetra milionë euro të zhduken në xhepat e klientëve të tyre, rafineria të mos punojë, nafta bruto të shitet për dy lekë, ndërsa specialistët dhe punëtorët të detyrohen të bëjnë protesta dhe greva urie për të marrë pagat e punës së papaguar.

Rama ua tha në sy që nuk e di se ç’do të ndodhë pas një viti me ta, as se kur do të rindizet rafineria, ndaj u them naftëtarëve që të mos gënjehen nga kocka që u hodhi qeveria, por të luftojnë me vendosmëri e deri në fund politikanët dhe qeveritarët e korruptuar të Shqiipërisë.