Një numër i zyrtarëve sauditë, përfshirë dy anëtarë të familjes mbretërore janë larguar nga puna.

Në dekretin mbretëror thuhet se mbreti Salman ka liruar nga detyra princin Fahad bin Turki nga roli i tij si komandant i forcave të përbashkëta të koalicionit të udhëhequr nga sauditët në Jemen, transmeton portali arbresh.info.

Djali i tij, Abdulaziz bin Fahad gjithashtu është larguar nga pozita e tij si zëvendësguvernatori.

Këta të dy, së bashku me katër zyrtarë të tjerë përballen me hetimet për marrëveshje të dyshimta financiare në Ministrinë e Mbrojtjes, thuhet në dekret.

Princi i kurorës, Mohammed bin Salman, i cili është djali i mbretit dhe konsiderohet si sunduesi de-fakto i Arabisë Saudite, ka nisur një fushatë kundër korrupsionit të dyshuar në qeveri.

Megjithatë, kritikët thonë se arrestimet e profilit të lartë kanë për qëllim largimin e pengesave të princit drejt pushtetit.

Në fillim të këtij viti, Wall Street Journal raportoi se tre anëtarë të lartë të familjes mbretërore ishin arrestuar, përfshirë vëllain e vogël të mbretit Princ Ahmed bin Abdulaziz dhe ish-princin e kurorës Mohammed bin Nayef.

Incidenti më i profilit të lartë, në vitin 2017, pa dhjetëra figura mbretërore saudite, ministra dhe biznesmenë të arrestuar në hotelin Ritz-Carlton në Riad./arbresh.info/