Veliu: Kosova ka shënuar progres të dukshëm në luftën kundër trafikimi me qenie njerëzore

20:30 | 27 Qershor 2020
Arditë Shkodra

Ministri i Punëve të Brendshme, Agim Veliu, ka vlerësuar se Republika e Kosovës ka shënuar progres të dukshëm krahasuar me raportin e vitit të kaluar dhe raportet e viteve paraprake.

Ai këtë vlerësim e bëri duke u bazuar në raportin e Departamentit Amerikan të Shtetit (DASH) për trafikim me qenie njerëzore për vitin 2019

Ai tha se ” rekomandohen përmirësime në fushën e gjykimeve përfundimtare dhe financimin e shtëpive të sigurta për viktimat e trafikimit”.

Veliu përmes një postimi në rrjetin social Facebook, gjithashtu ka falënderuar të gjithë ata që kanë kontribuar në luftën kundër trafikimit njerëzor, transmeton arbresh.info

Postimi i tij i plotë:

Të dashur qytetarë,

Departamenti Amerikan i Shtetit (DASH) ka publikuar raportin për trafikim me qenie njerëzore për vitin 2019.

Të bashkëngjitur gjeni vlerësimin tim si Ministër i Punëve të Brendshme.

Sipas raportit të DASH-it, Republika e Kosovës vazhdon të listohet në nivelin dy nga tri nivelet themelore, derisa raporti ka parasysh përpjekjet domethënëse të Qeverisë së Kosovës.

Rrjedhimisht, sipas raportit, Republika e Kosovës ka shënuar progres të dukshëm krahasuar me raportin e vitit të kaluar dhe raportet e viteve paraprake.

Në raport theksohet puna e shkëlqyeshme e Policisë së Kosovës, më saktë, e njësisë kundër trafikimit, e cila vazhdon të arrijë dhe regjistrojë rezultate të shkëlqyeshme nga viti në vit, derisa rekomandohen përmirësime në fushën e gjykimeve përfundimtare dhe financimin e shtëpive të sigurta për viktimat e trafikimit.

Me këtë rast dua të falënderoi të gjithë anëtarët e Autoritetit Kombëtar për luftë kundër trafikimit me qenie njerëzore për punën e tyre të palodhshme, duke u zotuar njëkohësisht se në koordinim me institucionet e tjera shtetërore, do të angazhohemi në përmbushjen e rekomandimeve të dala nga raporti i DASH-it, veçanërisht për një rregullativë ligjore më efikase për mbrojtjen e viktimave të trafikimit.