Sekretari i përgjithshëm i degës së PDK-së në Prizren, Visar Islamaj, ka akuzuar kryetarin e Komunës, Mytaher Haskuka, duke thënë se arroganca e tij ndaj drejtorëve të partnerëve të koalicionit, dhe ledhatimi i atyre që i ka emëruar vet në pozicione politike, ka sjellë pasoja të pariparueshme.

“Ushtrimi i pushtetit autoritar dhe arroganca e Mytaher Haskukes ndaj drejtorëve të partnerëve te koalicionit, dhe ledhatimi i atyre që i ka emëruar vet në pozicione politike, ka sjellë pasoja të pariparueshme për qytetin e Prizrenit. Në historikun e qeverisjeve të qytetit të Prizrenit, nuk mbahet mend të ketë pasur qeveri më të lodhur, me të dobët e me të korruptuar se kjo e Mytaher Haskukes”, tha ai.

Sipas tij, për shkak të Haskukës, Prizreni ka humbur 5 milionë euro buxhet nga grandet e qeverisë.

“Në këto tre vitet e fundit te qeverisjes nuk kam parë e as dëgjuar nga dikush se, në Prizren është realizuar ndonjë projekt i rëndësishëm ose i ndërmjetme. Është e turpshme që qyteti t’i humb 5 milionë euro buxhet nga grandet e qeverisë për shkak të arrogancës dhe paaftësisë për të qeverisur”, ka shkruar ai.