Kryeministri i Izraelit, Benjamin Netanyahu tha se janë duke vazhduar bisedimet me administratën e SHBA-së lidhur me “planin për aneksimin e Luginës së Jordanit dhe njësive të vendbanimeve të paligjshme hebreje që ndodhen në Bregun Perëndimor nën okupim”, transmeton Anadolu Agency (AA).

Netanyahu dhe kreu i Parlamentit izraelit, Yariv Levin u takuan në Kudsin Perëndimor me krerët bashkiakë të njësive të vendbanimeve të paligjshme hebreje në Bregun Perëndimor.

Në takimin ku u diskutua plani për aneksimin e Luginës së Jordanit dhe njësive të vendbanimeve të paligjshme hebreje në Bregun Perëndimor, Netanyahu kërkoi mbështetje për planin nga krerët e bashkive.

“Janë duke vazhduar bisedimet me administratën e SHBA-së lidhur me planin e aneksimit”, tha Netanyahu duke shtuar se plani i aneksimit është “një mundësi historike” për Izraelin dhe se është i gatshëm të bisedojë me palestinezët lidhur me planin e presidentit amerikan, Donald Trump.

Shtypi izraelit dje shkroi se Jared Kushner, dhëndërri dhe këshilltari i Trumpit i ka kërkuar Netanyahut dje gjatë një bisede telefonike që Izraeli ta marrë dalëngadalë planin e aneksimit.

Në planin e ashtuquajtur “Marrëveshja e Shekullit” për Lindjen e Mesme që Trump e prezantoi më 28 janar bashkë me kryeministrin izraelit, Benjamin Netanyahu në Shtëpinë e Bardhë, janë nenet që njësitë e vendbanimeve të paligjshme hebreje në Bregun Perëndimor të njihen si “territor i Izraelit” dhe që qeveria e Tel Avivit të vazhdojë sundimin mbi Luginën e Jordanit që i përket Palestinës.

Një komision i përbashkët i përbërë nga zyrtarë amerikanë dhe izraelitë, pas planit të ashtuquajtur plani për paqe, filluan procesin e hartëzimit në Bregun Perëndimor për aneksimin e rajoneve në fjalë.

Sipas marrëveshjes së nënshkruar mes Netanyahut dhe liderit të aleancës “Kaltër dhe Bardhë” Benny Gantz, kryeministri izraelit që nga 1 korriku mund të paraqesë për miratim në Parlament ose në kabinet “aneksimin” e njësive të vendbanimeve të paligjshme hebreje në Bregun Perëndimor dhe të Luginës së Jordanit.