Në lumin Morava e Binçës, rritja e nivelit të ujit, gjatë orëve në vazhdim rrezikon që të përkeqësohet gjendja në Budrikë, përderisa tashmë vërshimet kanë përfshirë fshatin Skifteraj, Pozheran e disa vendbanime të tjera.

Ndërkohë, që bëhet e ditur se lumi Morava në disa pjesë ka dalur nga shtrati dhe po rrezikon me përmbytjen e shumë hektarë tokë dhe objekte të tjera në Kllokot.
Hetem Jakupi përgjegjës i njësisë zjarrfikëse në Viti bënë të ditur se nga vërshimet në qytetin e Vitisë që ndodhën në orët e paradites, ekipet gjegjëse në teren kanë intervenuar në më shumë se 6 objekte për largimin e ujit, kurse në orët e pasdites ai tha se është rritur numri i kërkesave të tilla për ndihmë në pjesë të ndryshme të qytetit, madje edhe në periferi.
Situata është duke u keqësuar dhe ekipet kanë bërë mobilizimin e tyre në përgjithësi në rast nevoje nga njësia zjarrfikëse e cila do të angazhojë edhe ekipet rezervë.

Ekipet në kuadër të drejtorisë së shërbimeve publike, përfshirë të kompanisë “Hidromorava”, policisë dhe ato për menaxhimin e situatës janë angazhuar nga ora 24 e mbrëmjes. Meqë pritet që të ketë përkeqësim të situatës, ato do të kujdestarojnë edhe gjatë orëve të natës së sontme por me një mobilizim më të shtuar.