Ish-mbrojtësi anësor i Manchester Unitedit, Patrice Evra, ka zbuluar se si trajneri legjendar Sir Alex Fergusoni i kishte përgatitur lojtarët për një përballje me Arsenal duke ua dhënë një fjalim në zhveshtore.

Sir Alex Ferguson vlerësohet nga shumë tifozë të futbollit si trajneri më i mirë i të gjithë kohëve në botën e futbollit, shkaku i sukseseve të tij me Djajtë e Kuq – 13 tituj të Premierligës dhe dy të Ligës së Kampionëve, transmeton Gazeta Express.

Strategu skocez lavdërohet për aftësinë e tij për t’i motivuar lojtarët të jenë të etur për edhe më shumë suksese, përkundër periudhës dominuese që e kishin pasur në atë kohë në futbollin anglez. Mirëpo, tani Evra ka zbuluar se legjenda e Unitedit s’i ka motivuar ata me fjalime të zakonshme motivuese.

“Unë e mbaj mend një ndeshje. Ishte para se të luanim kundër Arsenalit. Ishte një e diel e bukur, dielli po ndriçonte dhe fjalimi i Fergusonit ishte vetëm 15 sekondësh”, ka thënë Evra, në një intervistë të dhënë për Sky Sports.

“Ai ma tha: “Djema është e diel, po ndriçon dielli me të vërtetë jashtë. Nuk dua që asnjëri prej jush të ma prish këtë të diel””.

“Dhe ti menjëherë e dije se nëse do ta humbje një harkim ose diçka të tillë… ti nuk doje të ishte personi që bënte diçka të tillë. Nuk doje t’ia prishje të dielën – ishte shumë e rëndësishme për të”.