Autori: Ilir Ejupi

E gjithë klasa politike në Kosovë, para zgjedhjeve, e ka të mbushur gojën plot me demokraci, drejtësi, respektim të mendimit ndryshe dhe lirisë së fjalës, luftën ndaj korrupsionit, nepotizmit etj., mirëpo në momentin kur e marrin pushtetin të gjitha mjetet dhe potencialin e kthejnë në luftën se cili po merr më shumë pushtet dhe cili po shtrinë ndikim më të madh te qytetarët. Kjo logjikë e të bërit politikë na çon tek ato sisteme totalitare, të cilat në emër të demokracisë gjithçka e fusin nën kthetrat e tyre.

Nuk mund të bashkëqeverisësh me tendencat e shtrirjes së elementeve totalitare brenda një sistemi demokratik dhe të mbash gjithçka nën kontrollë kur je në partneritet të paimponuar e të vullnetshëm në qeverisje. Shprehja e fjalës së lirë dhe mendimit ndryshe është e garantuar me kushtetutë dhe ligjet në fuqi brenda një sistemi demokratik.

Personave që kanë element totalitare e diktatoriale asnjëherë nuk duhet t’iu ipet pushtet i madh, sepse nuk do ta lënë asnjë pore të shoqërisë pa e shtrirë ndikimin dhe kontrollin e tyre. Të mendosh ndryshe nga ata, ti do të konsiderohesh armik i shtetit dhe pushtetit, mendimin ndryshe do ta marrin si shkelje ligjore e tradhëti kombëtare. Prandaj, duhet pasur kujdes nga ata persona, të cilët në emër të demokracisë duan ta marrin pushtetin absolut, që më pas t’i shtrijnë bindjet e tyre totalitare në të gjitha poret e shoqërisë.

Demokracia dhe totalitarizmi kanë një element të përbashkët, jo në përmbajtje, por në formën e saj ideologjike. Sistemi totalitar gjithmonë thirret dhe kërkon që ta marrë pushtetin nga shumica, ndërsa me marrjen e pushtetit ai bëhet sistem kontrollues i shumicës. Klod Lëfor thotë se totalitarizmi buron nga demokracia, ku si shembull e merr Nazizmin si një sistem totalitar, i cili me propagandën e tij politike ka marrë besimin e shumicës, ku me pas e ka shtrirë ndikimin e tij totalitar në çdo sferë të shoqërisë.

Si çdo sistem tjetër po ashtu demokracia dhe totalitarizmi përdorin ideologjitë e tyre politike për të marrë dhe mbajtur pushtetin. Demokracia dhe totalitarizmi si dy sisteme politike janë të kundërta me njëra-tjetrën në përmbajtjen e tyre. Demokracia është një sistem politik, i cili mbështetet në vullnetin e shumicës. Pra, shumica është ajo e cila përmes votës së tyre i zgjedh përfaqësuesit e vet, mirëpo për ta kompletuar konceptin e demokracisë duhet që shumicës t’ia shtojmë edhe pakicën, ku e nxjerrim një definicion më të pranueshëm, siç është: “Demokracia është sundim i shumicës, gjithmonë duke e respektuar vullnetin e pakicës. Pra, të gjitha elementet e demokracisë duhet t’i gëzojë edhe pakica.

Demokracia në vete përmban disa elemente të mira për funksionimin e shoqërisë: Ekziston liria dhe e drejta e individit; liria dhe pavarësia e mediave; Zgjedhje të lira dhe të pandikuara; funksionim i ligjit etj. Ndërsa, totalitarizmi e kontrollon dhe e mban të shtypur shumicën, duke e favorizuar dhe privilegjuar pakicën. Në sistemin totalitar ekzistojnë partitë politike, mirëpo nuk ekziston pluralizmi politik dhe konkurrenca politike. Në sistemet totalitare nuk ekziston liria e individit, mediat janë të kontrolluara nga pushteti, mungon kritika politike. Karl Popperi thotë së kritika politike është elementi më i rëndësishëm i një shoqërie demokratike. Pra, qytetarët nuk janë të lirë që të kritikojnë, t’i shprehin mendimet e tyre dhe të japin variante të ndryshme në sfera të ndryshme të funksionimit të shoqërisë.

Nga ajo që u tha me lartë mund të themi se, demokracia dhe totalitarizmi kanë të përbashkët formën e marrjes së pushtetit, ndërsa në përmbajtje janë diametralisht të kundërta njëra më tjetrën.

Në Kosovë, qytetarët nuk duhet të bien pre e politikave të cilat kanë tendencë për të marrë një pushtet absolut duke u thirrur në emër të demokracisë dhe të kauzave me të cilat po përballet vendi, sepse rrezikojmë të rrëshqasim në një sistem totalitare, i cili do t’a kontrollojë çdo sferë të shoqërisë, duke u nisur nga shprehja e fjalës së lirë dhe mendimit ndryshe deri te kontrolli i mediave, ekonomisë, drejtësisë etj. Me këtë, ne rrezikojmë humbjen e partnerëve ndërkombëtarë, të cilët e ruajnë me fanatizëm sistemin demokratik, lirinë e fjalës dhe mendimit ndryshe.