Aleanca Kosova e Re (AKR) do ta përkrah mocionin e ngritur nga Lidhja Demokratike e Kosovës (LDK) për rrëzimin e Qeverisë Kurti.

Kështu ka bërë të ditur AKR përmes një njoftimi për media.

“Aleanca Kosova e Re është parti opozitare, konstruktive dhe shtetformuese. Eksperienca jonë gjatë muajve të fundit në Parlamentin e Kosovës nuk ka qenë fare e mirë. Ka munguar çdo kontakt (edhe human) me partitë qeveritare, (pos disa deputetëve të LDK-së). Në këtë rast, ne nuk do të qëndrojmë të vetmuar dhe do të votojmë mocionin e ngritur nga Lidhja Demokratike e Kosovës”, thuhet në njoftim.

Po ashtu, AKR, vlerëson se kjo qeveri po e rrëzon veten në kohën më të keqe të mundshme.

“Vendi ka nevojë për qeveri që iu shërben qytetarëve në këtë kohë krize ku po përballemi me pandemi botërore, e jo për qeveri që merren me kriza artificiale, me njëri- tjetrin”, thuhet në njoftim.

Kreu i AKR-së, Behgjet Pacolli ka pranuar një telefonatë nga z. IsaMustafa dhe ia ka prezentuar qëndrimin e AKR-së./arbresh.info