Pronarët dhe punonjësit e Mittsume Desserts, në Taipei, Tajvan, u lodhën dhe u ngopën me blogeret dhe influencueset që bënin foto në lokal prandaj i ndaluan hyrjen.

Përmes një postimi në Instagram, e bënë mëse të qartë që influencueset nuk janë të mirëpritura në Mittsume Desserts.

“Duke nisur nga sot, është i ndaluar fotografimi i tavolinës,” shkruhet në postim. “Ju lutem mos ndërroni vendin ku jeni ulur për të bërë foto. Vaniteti online ndalohet rreptësisht.”

Mesa duket, kafeneja e famshme vuri re se influencueset po ndërhynin në përvojën e klientëve të tjerë teksa krijonin kontent për rrjetet sociale – sillnin libra për të realizuar foton që kishin në mendje, lëviznin moblijet e kafenesë dhe sillnin ushqim nga jashtë.

Postimi shton se nuk lejohen më qëndrimi në këmbë për të bërë foto dhe nuk lejohet fotografimi i klientëve të tjerë duke ngrënë.

“Ju mirëkuptojmë nëse doni të mbani mend një tortë që hëngrët apo një qoshkë të lezetshme të kafenesë,” sqaron Mittsume Desserts. “Por kultura e rrjeteve sociale i ka bërë njerëzit të ngatërrojnë të qenit klient me pronar lokali. Nuk po ndalojmë fotot, thjesht shpresojmë që të gjithë të qëndrojnë në tavolinën e tyre dhe të mos shqetësojnë të tjerët.”