Presidenti turk, Recep Tayyip Erdogan ka bërë të ditur se Turqia ka filluar vendosjen e trupave në Libi, pasi Parlamenti dha dritën jeshile gjatë javës së kaluar.

“Detyra e ushtarëve tanë ka koordinim. Ata do të zhvillojnë qendrën e operacionit atje. Ushtarët tanë po shkojnë gradualisht tani,” i tha ai transmetuesit CNN Turk, transmeton portal arbresh.info

Ushtarët do të veprojnë në mbështetje të Qeverisë së Akordit Kombëtar (GNA) të njohur ndërkombëtarisht të Fayez al-Serraj, me qendër në Tripoli.

Erdogan ka shtuar se trupave ushtarake do t’u bashkohen edhe personeli i lartë ushtarak.

GNA, e mbështetur nga Kombet e Bashkuara, Turqia dhe Katari, ka qenë nën rrethim të vazhdueshëm nga gjenerali i fortë ushtarak Khalifa Haftar i cili nisi një sulm në prill. Haftar ka mbështetjen e rivalëve rajonalë të Turqisë, Emiratet e Bashkuara Arabe dhe Egjiptit.

Erdogan tha për CNN se objektiv i Turqisë ‘nuk është lufta’, por ‘mbështetja legjitime dhe shmangia e një tragjedie humanitare’./arbresh.info/