Një studim i vogël ka sugjeruar që një njeriu i duhen vetëm katër net pa gjumë, që të shtojë peshë dhe që organizmi të ndryshojë mënyrën e deponimit të yndyrës në trup, shkruan Dailymail, transmeton Gazeta Express.

Hulumtuesit nga Universiteti i Pensilvanisë kanë vërejtur se pjesëmarrësit që kanë qenë të deprivuar nga gjumi kanë treguar se ushqimet nuk i kanë shijuar shumë, në krahasim me ata të cilët kanë bërë një gjumë të mirë.

Hulumtuesit gjetën se konsumimi i ushqimeve pasi keni fjetur keq, çon në një rritje të nivelit të insulinës në trup, dhe një pastrim më të shpejtë të lipideve dhe yndyrnave. Mirëpo kjo yndyrë e pastruar akumulohet në trup, dhe kështu ju shtoni peshë.

Ekipi i shkencëtarëve tha se këto gjetje janë një evidencë më shumë në mesin e shumë efekteve negative që mungesa e gjumit ka.

Sipas ekspertëve, një i rritur duhet të flejë shtatë deri në nëntë orë gjatë natës. Mirëpo fatkeqësisht, sipas raporteve 50% e njerëzve flenë më pak se orët e rekomanduara.

Mungesa e gjumit sipas studimeve të mëparshme, e rrit rrezikun e obezitetit, diabetit, sëmundjeve të zemrës dhe kancerit.