Një gjimnazist i vitit të dytë është plagosur me thikë nga shoku i tij, në oborrin e shkollës “Asim Vokshi” në Bajram Curri. Ndërkohë që luanin gjatë pushimit, të rinjtë janë konfliktuar deri në ndeshje fizike mes tyre, ku njëri prej nxënësve ka mbetur i plagosur si pasojë e goditjes me armë të ftohtë nga nxënësi tjetër.

17-vjeçari me iniciale A.I. mësohet se është qëlluar disa herë me thikë në zemër nga bashkëmoshatari. Ai u nis me urgjencë me helikopter drejt Spitalit të Traumës në Tiranë, nga ku mësohet se ndodhet jashtë rrezikut për jetën.

Ndërkohë autori i plagosjes është ndaluar nga uniformat blu. Ngjarja e rëndë u dënua nga Ministria e Arsimit, e cila u bëri thirrje autoriteteve që të garantojnë jetët e nxënësve.

Ministrja e Arsimit dhe Sportit, Lindita Nikolla, pasi mori informacionin nga Zyra Arsimore Tropojë ka qenë në komunikim të vazhdueshëm me autoritet, për t’u siguruar që janë marrë të gjitha masat e nevojshme për garantimin e jetës së nxënësit.

Ndërkohë, me urdhër të Ministres së Arsimit, është nisur menjëherë grupi i inspektimit drejt qytetit të Bajram Currit për të verifikuar ngjarjen e cila ka ndodhur brenda ambienteve të shkollës, si edhe për të marrë masat e nevojshme ndaj përgjegjësve.

“Ministria e Arsimit dhe Sportit, nuk toleron asnjë veprim që cënon jo vetëm formimin e personalitetit të brezave të rinj, por mbi të gjitha që ndesh në shkelje të rëndë të të drejtave të fëmijëve dhe të njeriut. Ndaj, viti i ri shkollor 2015-2016, është cilësuar nga MAS si viti i luftës pa kompromis kundër dhunës në shkollë”, thuhet në njoftimin e ministrisë./shekulli/