Një burrë është sulmuar me çekiç dhe një dërrasë jashtë një xhamie në lindje të Londrës, raportojnë mediat britanike, disa orë pas sulmit terrorist në Zelandën e Re, ku mbetën të vrarë 49 besimtarë myslimanë.

Një grup burrash raportohet të kenë bërtitur komente islamofobike gjersa kalonin me makinë pranë xhamisë dhe i quanin pjesëtarët e komunitetit myslimanë ‘terroristë’, dëshmitarë kanë thënë për gazetën the Independent, transmeton portali arbresh.info.

Një prej tyre pastaj thuhet të ketë dalë nga automjeti dhe sulmoi njëri nga besimtarët. Viktima 27-vjeçare ka pësuar lëndime në kokë.

Në një video të filmuar nga një dëshmitar, një nga sulmuesit u pa duke u ngjitur në pjesën e përparme të makinës në një përpjekje për t’u larguar nga vendi i ngjarjes.

“Të dyshuarit u kthyen në makinën e tyre dhe u larguan nga vendi para se të mbërrinte policia”, një zëdhënës i Policisë Metropolitane të Londrës i tha Independentit, duke shtuar se të dyshuarit u përshkruan të gjithë si burra të bardhë, që besohet të jenë në të 20-at.

Asnjë arrestim nuk është bërë ende./Arbresh.info/