Kritikat e ndërkombëtarëve për lënien e mandateve kanë qenë të shumta, përfshi edhe këtë të enjte me një reagim të Sekretarit të Shtetit në Ministrinë e Jashtme gjermane, Michael Roth.

Berisha ka bërë një koment të shkurtër në lidhje me këto kritika, duke u përpjekur të shpjegojë se përse opozita ka shkuar në këtë qëndrim ekstrem. Berisha shkruan në rrjetin social se ai e kupton fare mirë qëndrimin e ndërkombëtarëve, por kjo ishte e vetmja zgjidhje që kishte opozita.

“Duke ndjekur “Opinion”. Miq, po diskutohet këto kohë lidhur me qëndrimin ndërkombëtar ndaj djegies se mandateve nga opozita, lidhur me këtë problem theksoj:

Se pari, vetkuptohet se komuniteti zyrtar ndërkombëtar nuk mbështet dhe nuk mund te mbështesë djegien e mandateve.

Se dyti, mendoj se opozita ka mirëkuptim për këto qëndrime dhe po bën gjithçka për te qartësuar shkaqet qe detyruan opozitën për vendimin e saj.

Se treti, sot opozita dhe shqiptaret ne tërësi me protestën dhe kauzen e tyre kane fituar me shpejtësi te rrufeshme pushtetin e katërt botëror. Mediat e botes kane paraqitur revolucionin e shqiptareve si ngjarje botërore, ne qindra e qindra lajme kane informuar publikun e tyre se opozita shqiptare proteston kundër lidhjeve te qeverise se Edvinit me krimin, korrupsionin e papërmbajtur dhe dhunimin e zgjedhjeve, dosjet famoze te prokurorisë, proteston kundër narkoshtetit dhe kontrollit te Shqipërisë tashme Kolumbi e Europes nga mafia.

Si përfundim, protesta historike e opozitës nëpërmjet mediave te medha po fiton mendjen dhe zemrën e komunitetit ndërkombëtar dhe ka damkosur narkoshtetin e regjimit te kakistokracise. Revolucioni i pandalshëm po ecen drejt fitores! Cunami i datës 16 mars do mahnise boten!” – shkruan Berisha në Facebook.