Kreu i ekzekutivit, Ramush Haradinaj, ka përkujtuar 21-vjetorin e Betejës së Likoshanit dhe Qirezit.

Kryeministri i vendit, Ramush Haradinaj në 21-vjetorin e Betejës së Likoshanit dhe Qirezit tha se shteti i pavarur dhe sovran i Kosovës rrënjët i ka në luftën e lavdishme çlirimtare dhe në rezistencën e shumë brezave.

Haradinaj përmes një postimi në profilin e tij zyrtar në rrjetin social Facebook, ka shkruar se në thelb të vizionit për të sotmen dhe të ardhmen tonë qëndron si testament flijimi i dëshmorëve e martirëve.

Postimi i plotë i Haradinajt pa ndërhyrje:

Shteti i pavarur dhe sovran i Kosovës u lind dhe i ka rrënjët në luftën e lavdishme çlirimtare dhe rezistencën e shumë brezave për të drejtën tonë.

Sot, kur kujtojmë me nderim 21-vjetorin e Betejës së Likoshanit dhe Qirezit, pikënisje e historisë sonë të re, reflektojmë për rrugëtimin tonë deri në Kosovën e 17 shkurtit 2008.

Në thelb të vizionit për të sotmen dhe të ardhmen tonë qëndron si testament flijimi i dëshmorëve e martirëve.

Lavdi e përjetshme të gjithë të rënëve për lirinë e Kosovës!.