Sipas disa burimeve diplomatike, Italia e ka kundërshtuar shpalljen e një deklarate të përbashkët të Bashkimit Evropian për njohjen e Juan Guaidos si president të përkohshëm të Venezuelës.

Shtetet e Bashkimit Evropian kanë zhvilluar debate për disa ditë me radhë lidhur me zgjidhjen e krizës në Venezuelë. Deri tash, dhjetë vende evropiane e kanë njohur udhëheqësin e opozitës si president të vendit, pas kalimit të afatit që i ishte caktuar Nicolas Maduros për të shpallur zgjedhje të reja. Në anën tjetër, disa vende tjera po ngurrojnë ta krijojnë precedentin e njohjes së një presidenti të vetëshpallur.

Megjithatë, siç duket, Italia ka vendosur të rreshtohet në grupin e vendeve që e përkrahin presidentin zyrtar, Nicolas Maduro. “Shtetet anëtare të BE-së do ta njohin Juan Guaidon si president të përkohshëm të Venezuelës. Bëjmë thirrje për zgjedhje të lira dhe demokratike”, ishte teksi i propozuar për deklaratën e përbashkët.

Italia nuk është shteti i vetëm që nuk po e njeh Guaidon si president të Venezuelës. I pyetur se a do ta njohë Irlanda Guaidon si president, ministri i jashtëm irlandez, Simon Coveney, ka thënë: “Jo, pozicioni ynë është i qartë. Ne dëshirojmë të shohim zgjedhje të lira për popullin në mënyrë që të merret një vendim demokratik në Venezuelë”, ka thënë ai, shkruan “Reuters”.