AGK me shqetësim e ka pranuar një incizim telefonik në të cilin Olluri e kërcënon gazetarin duke i kërkuar të mos merret me të.

“Unë po të tregoj: mos u merrni me mua se nuk ja kom borxh askujt karrierën politike dhe ta keni të qartë këtë punë. Por dije se nëse vjen puna unë e heq kollaj kravatën dhe jap dorëheqje. E pastaj merrna me ty dhe ta zë rrugën”, i ka thënë Olluri gazetarit Ademi nëpërmjet telefonit.

Sipas Ademit, zyrtarët komunalë të Lipjanit, disa herë i kanë bërë presione dhe shantazhe me qëllim të zmbrapsjes nga shkrimet për qeverisjen lokale. Në telefonatën që ia ka bërë gazetarit, Olluri ka përdorur edhe gjuhë banale e denigruese.

“AGK e dënon kërcënimin dhe gjuhën e zyrtarit komunal ndaj gazetarit dhe e fton Ollurin të distancohet nga kjo qasje ndaj Ademit dhe t’i kërkojë falje publike”, thuhet në reagim.

AGK e fton Ollurin, që në rast se ka pretendime ndaj shkrimeve të realizuara nga Ademi, t’i ndjek rrugët ligjore dhe assesi të mos përdorë gjuhë kërcënuese, banale e denigruese ndaj gazetarit.

Asociacioni i Gazetarëve të Kosovës inkurajon gazetarët që të mos zmbrapsen nga kërcënimet e tilla ndërsa rastet e pengimit në punën e tyre profesionale t’i lajmërojnë në polici dhe në Asociacionin e Gazetarëve të Kosovës.