Grupet e përfshira në konfliktin në Jemen, kanë konfirmuar pjesëmarrjen e tyre në bisedimet e paqes në Suedi, deklaroi i dërguari i Posaçëm i OKB-së për Jemenin, Martin Griffiths, raporton Anadolu Agency (AA).

“Ky është një moment vendimtar për Jemenin. Kam marrë garanci të forta nga liderët e palëve në Jemen”, tha Griffiths në një takim të Këshillit të Sigurimit të OKB-së.

“Ata ishin të përkushtuar për të marrë pjesë në këto konsulta. Besoj se janë të sinqertë”, tha ai.

Griffiths tha se javën e ardhshme do të udhëtojë në Sana, nga ku, nëse është e nevojshme, bashkë me delegacionet do të udhëtojë për në Suedi.

I dërguari i OKB-së theksoi se është afër zgjidhjes së çështjeve përgatitore, të cilat do të bëjnë të mundur nisjen e bisedimeve.

“Rritja e vëmendjes ndërkombëtare, ka bërë që të ripërtërihet përkushtimi i palëve në Jemen për një zgjidhje politike”, tha Griffiths.

Jemeni është rrënuar nga dhuna që nga viti 2014, kur rebelët e Houthi morën kontrollin në pjesën më të madhe të vendit, përfshirë kryeqytetin Sana.

Konflikti u përshkallëzua në vitin 2015, kur Arabia Saudite dhe aleatët e saj arabë nisën një fushatë shkatërruese ajrore në Jemen, që synonte të rikthente territoret e marra nën kontroll nga rebelët.