Një klienteje të një kompanie telefonike në Britaninë e Madhe i mbërriti fatura prej rreth 4 mijë euro, pasi kishte përdorur shërbimin roaming.

Kur Rahime Sulja nga Leicesteri, vizitoi Kosovën në verë, mori një mesazh “Mirë se vjen në Slloveni” dhe që mund të përdorte të njëjtin plan si në vendin e saj, në bazë të marrëveshjeve pa roaming të BE-së.

Por kur u kthye në Britani, siç mëson Top Channel, ajo pa se fatura ishte 2751 funte (rreth 3100 euro) në njërin telefon dhe 663 funte (rreth 760 euro) në tjetrin.

Fatmirësisht kompania telefonike e korrektoi gabimin dhe Sulja nuk e pagoi faturën.

Ajo gjithashtu zbuloi se edhe për vizitat e mëparshme ishte mbitarifuar, por për shkak se kishte shkuar në Shqipëri, ku e dinte se ka tarifa roaming, nuk kishte kuptuar se u tarifua dhe për Kosovën.