Serbët, protagonistë sherresh në Botërorin e Rusisë

18:05 | 28 Qershor 2018
Arbresh.info

Brazil-Serbi ishte ndeshja e grupit E, që pritej me më shumë interes. Në lojë ishte kualifikimi, apo vendi i parë i këtij grupi.

“Seleçao” fitoi 2-0 një ndeshje që e kontrolloi gjatë të gjithë kohës, por pati edhe momente kaosi, e kjo më shumë në shkallët e stadiumit. Protagonistë u bënë tifozët e të dyja skuadrave, që u përfshinë në një përleshje mes tyre.

Një situatë kjo, që solli ndërhyrjen e menjëhershme të forcave të sigurisë, të cilët e qetësuan shpejt situatën në stadium.

Në medien serbe, kjo ngjarje u përkufizua si një rrufe në qiell të hapur, pasi atmosfera në Moskë, gjatë të gjithë këtyre ditëve ishte festive, e të gjithë ishin në paqe me njëri-tjetrin. Ndërkohë, ishin të shumë tifozët serbë që kishin shkuar në mbështetje të skuadrës së tyre.

Por, kjo ndeshje pati dhe një histori tjetër dhune, me protagonistë po serbë. Ironia e fatit deshi që arena e sherrit të radhës të ishte pikërisht Vjena, aty ku ditë më parë, ata u përplasën me tifozë shqiptarë pak ditë përpara sfidës mes Serbisë dhe Zvicrës.

Plot 200 persona hodhën flakadanë dhe dolën në rrugë me thirrje nacionaliste duke bllokuar rrugët. Policia austriake ndërhyri shpejt duke e qetësuar gjendjen.