Talenti brazilian Endrick është zyrtarisht lojtar i Olympique Lyon, pasi klubi francez ka arritur marrëveshje me Real Madridin për huazimin e tij.

Sulmuesi 18-vjeçar do të luajë te Lyoni deri në qershor të vitit 2026, ndërsa marrëveshja nuk përfshin opsion blerjeje, me Real Madridin që e sheh Endrickun si pjesë të planeve afatgjata të klubit, shkruan Arbresh.info.

Sipas marrëveshjes, Lyoni do të mbulojë 50 për qind të pagës së lojtarit, ndërsa në kontratë është përfshirë edhe një klauzolë e veçantë që garanton një numër minimal ndeshjesh si titullar për Endrickun.

Huazimi në Ligue 1 shihet si një hap i rëndësishëm për zhvillimin e brazilianit, i cili synon të fitojë më shumë minuta për Kupën e Botës e cila mbahet në vitin 2026.

Endrick iu bashkua Madridit si 17-vjeçar nga Palmeiras në dhjetor 2022 dhe nënshkroi zyrtarisht në korrik 2024.

Deri më tani, ai ka zhvilluar 40 ndeshje në të gjitha kompeticionet për Madridin, duke shënuar shtatë gola dhe një asistim./Arbresh.info