Retorika antigreke në Shqipëri kohët e fundit është përtej çdo precedenti. Kështu shkruajnë mediat greke, sot, duke komentuar deklaratën e kryeministrit Rama, që në një postim në “Facebook”, mes të tjerash shkruante se Akropoli shpëtoi falë një shqiptari.

Mediat greke kanë reaguar thuajse njësoj, duke e quajtur gjithë këtë deklaratë, ironike, fyese e të papranueshme, shkruan “Panorama”.

Të tjera e quajnë një hedhje benzine në zjarr nga ana e kryeministrit Rama.

“Me ofensivë të paparë, nacionalizëm ekstrem ka reaguar kryeministri shqiptar Edi Rama në deklaratën e ministrit të Jashtëm grek për banesat në Himarë”- shkruajnë mediat greke.

“ProNews” shkruan se Rama nuk është aspak në dijeni të historisë së vërtetë të Akropolit: “Edhe një herë, kryeministri i Shqipërisë Edi Rama foli për çështjen e Himarës. Edi Rama publikoi në adresën e tij në ‘Facebook’ një gravurë ku dukej Athina e vitit 1670 dhe shkruajti se Akropoli vazhdon të qëndrojë falë shqiptarit Gjergj Dushmani, që i kërkoi venecianëve të mos bombardonin Athinën. Duket se zoti Rama ka harruar pjesë kryesore të historisë për arsyen se Gjergj Dushmani nuk ishte as arianitas, dhe se shqiptarët e tjerë nuk kanë të bëjnë aspak me shqiptarët e sotëm. Injoranca e kryeministrit shqiptar është për të qeshur”.