Kreu i opozitës shqiptare, Lulzim Basha ka akuzuar kryeministrin Edi Rama për shndërrimin e Shqipërisë në vend të drogës dhe të krimit të organizuar.
“Droga nuk është problem politik, por është problem kombëtarë. Pa zgjidhjen e këtij problemi, Shqipëria nuk ka të ardhme”.

Ai ka fajësuar Ramën për amatorizëm dhe papërgjegjësi në zbatimin e politikave kombëtare ndaj shqiptarëve të Kosovës dhe të rajonit.

“Në ditën e Pavarësisë e trajton Kosovën si provincë të Shqipërisë. Kosova është një shtet sovran dhe arritje shumë e rëndësishme e të gjithë shqiptarëve. Ai i jep municion palës tjetër të luajë me tezën e Shqipërisë së Madhe”, ka thënë Basha për median shqiptare në Maqedoni “Almakos”.

Sipas tij, marrëdhëniet e Shqipërisë me Maqedoninë janë në koma, sepse ka shumë takime boshe të cilat nuk prodhojnë rezultate konkrete për qytetarët e të dy vendeve.

Lidhur me rolin e partive shqiptare në Maqedoni, të cilat keqpërdorin vizitat në Shqipëri për të mbuluar dështimet e tyre politike, Basha përgjigjet se Tirana nuk është vendi ku lahen mëkatet e tyre sepse qeveria shqiptare ka shumë mëkate ndaj shtetasve të saj e jo më të kujdeset për shqiptarët jashtë kufijve.