Javën e kaluar, kryeministri i Kosovës, Ramush Haradinaj bëri vizitën e parë zyrtare jashtë vendit që nga marrja e postit. Ai zgjodhi shtetin fqinj, Shqipërinë që ta vizitoj të parin.

Atje ai u prit nga homologu i tij, Edi Rama, me të cilin njoftuan për shumë ide që planifikojnë t’i realizojnë në dy shtetet shqiptare, shkruan Indeksonline.

Heqja e kufijve mes Kosovës e Shqipërisë u përfol shumë në takimin e tyre. Profesori i Integrimeve Evropiane, Avni Mazreku për idenë e shefave të ekzekutivit ka thënë se kjo varet nga anëtarësimi i dy vendeve në organizatat ndërkombëtare.

Ai ka thënë për Indeksonline se çështja e kufijve mes dy shteteve është çështje e raporteve ndërkufitare dhe se kjo mbetet të shihet a do të realizohet gjatë ditëve në vijim, ndonëse BE-ja do të kundërshtonte një gjë të tillë.

“Sa i përket zonës shëngen, aplikimi i rregullave të reja në raport me vendet e kësaj zone, vije si rezultat i shkallës së lartë të rrezikut nga organizatat dhe aktet terroriste që kanë ndodhur në këto vise. Kontrolli kufitar vije pra si rezultat i rrezikut që organizatat terroriste paraqesin për disa vende të BE”, ka theksuar Mazreku.

Për idenë tjetër që Haradinaj e Rama prezantuan gjatë një konference të përbashkët në lidhje me krijimin e konsulatave të përbashkëta nëpër botë, ai mendon se do të ishte një veprim i duhur.

“Sa i përket konsullatave të përbashkëta, është veprim i duhur sepse edhe paslufta na tregon që në veprimet diplomatike për Kosovën dhe në emër të saj, pavarësisht që Kosova nuk ka qenë falënderuese, shteti shqiptar dhe diplomacia e saj na ka ndihmuar shumë. Historia e diplomacisë shqiptare dhe eksperienca e saj është më e avancuar se ajo e jona, prandaj çfarëdo mbështetje që na vjen është e mirëseardhur”, ka shtuar Mazreku.

Sipas tij, një nga faktet se Kosova nuk është e pasur sa të ketë shërbim konsullor në shumë vende, atëherë nuk ka pse të mos përdoren konsullatat bashkë me Shqipërinë.