Katër shtetas francezë janë arrestuar në flagrancë nga strukturat hetimore të Komisariatit të Policisë Sarandë, pas dokumentimit të dy rasteve të vjedhjes në Ksamil dhe Sarandë, njofton Policia e Shtetit.

Tre prej tyre, P. K., 21 vjeç, H. K., 21 vjeç dhe Y. N., 22 vjeç, banues në Paris, Francë, u kapën në Ksamil më 4 shtator 2025, pasi dyshohet se në një lokal të lagjes nr. 3 kanë vjedhur sende elektrike, shishe me pije alkoolike dhe kanë dëmtuar me mjet prerës një mjet lundrues të llojit “gomone”.

Ndërsa në Sarandë, B. S., 27 vjeç, gjithashtu banues në Paris, u arrestua pasi dyshohet se ka vjedhur aparatin celular të një qytetari tjetër në një lokal të lagjes nr. 4.

Një pjesë e sendeve të vjedhura është sekuestruar si provë materiale, ndërsa materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë për veprën penale “Vjedhja”.