Skandalet e “Hollywood”, Weinstein rrezikon arrestimin

20:12 | 4 Nëntor 2017
Trina Galanxhi

Dy figurat kryesore të gjendura në mesin e skandaleve që kanë tronditur Hollivudin po përballen me pasojat e veprimeve të tyre të pandëshkuara në vite.

Policia e Nju Jorkut e bëri të qartë se ka prova mjaftueshëm për ndalimin e Harvey Weinstein, ndërsa Netflix i ndërpreu përfundimisht marrëdhëniet me Kevin Spacey. Akuzat e Paz de la Huerta i tingëllojnë bindëse autoriteteve policore, që duken të gatshme të hidhen në veprim.

Aktorja tha më herët për “Vanity Fair” se Weinstein e kishte përdhunuar dy herë në Nju Jork në vitin 2010. Tashmë, janë mbi një duzinë grash që ngrenë pretendime të njëjta ndaj 65-vjeçarit e shumë të tjera e akuzojnë për ngacmime seksuale dhe akte të pahijshme.

Robert Boyce, i Policisë së Nju Jorkut, tha: “De la Huerta bëri një rrëfim të detajuar e mjaft të besueshëm të ngjarjes. Këtu kemi material real për ta ngritur çështjen në gjyq. Aktualisht, jemi në procesin e mbledhjes së provave”.

Nëse Weinstein, sipas zyrtarit të policisë, do të jetë jashtë shtetit të Nju Jorkut në rastin se forcat e rendit do të duan ta arrestojnë, policisë do t`i nevojitet një urdhër gjykate.

Netflix-i ndërkohë deklaroi prerazi se nuk do të përfshihet më në produksionin e “House of Cards” nëse Spacey, i akuzuar për ngacmime dhe agresion seksual, do të vazhdojë të shfaqet në serialin tejet popullor.