Kryeministri i Republikës së Maqedonisë, Zoran Zaev, ka dërguar telegram ngushëllimi për qytetarët e Mbretërisë së Bashkuar, të Britanisë së Madhe dhe Irlandës Veriore, pas sulmit të mbrëmshëm në Londër në të cilën humbën jetën shtatë vetë dhe u lënduan 48 të tjerë, përcjell Telegrafi Maqedoni.

“E dënojmë shumë ashpër këtë sulm shokues qyqar ndaj banorëve të pafajshëm të Londrës, në Urën e Londrës dhe në restorantet përreth, ndër të cilët ka edhe vizitorë të Londrës. Çdo akt i rrezikimit të jetëve, kudo qoftë është rrezikim i lirisë dhe qetësisë të tërë njerëzimit”

“Solidarizohemi me qytetarët e Britanisë së Madhe dhe fuqimisht dhe me vendosmëri qëndrojmë në anën e Britanisë. Jemi të bindur se hetimi do t’i zbardhë deri në fund motivet e këtij sulmi dhe porositësit dhe të involvuarit do të ballafaqohen me drejtësinë” thuhet në telegramin e Zaevit.

Republika e Maqedonisë, thekson Zaev, është e gatshme të ndihmojë dhe të veprojë e bashkuar me botën e civilizuar në ballafaqimin e të gjitha formave të dhunës dhe terrorizmit.