Që prej 3 Marsit, komuna e Tuzit po drejtohet nga vetë Shqiptarët duke i dhënë fund pas 63 vitesh, administrimit nga bashkia e Podgoricës.

Koalicioni fitues “Malsia na Bashkon” dhe kryetari i përzgjedhur Nikë Gjeloshaj, në këto 5 muaj detyrë kanë arritur të formojnë administratën e plotë, të ndërtojnë strukturat e nevojshme për qeverisjen vendorë dhe këtë të enjte arritën të miratonin edhe buxhetin e vitit 2019, duke i hapur rrugë edhe projekteve të para për këtë zonë.

“Projekt kryesor është zhvillimi i infrastrukturës dhe i këtij vendi, sepse ka qenë fare i pazhvilluar. Do bëjmë lidhje më të mirë rrugore me Podgoricën”, tha Nikë Gjeloshaj, kryetar i komunës Tuz.

Shqiptarët janë të kënaqur që më në fund janë “zot” në shtëpinë e tyre dhe kërkojnë që tashme të mbahen premtimet e dhena në fushatë dhe të investohet.

Pasi fituan betejën për të drejtuar Komunën e Tuzit, tashmë shqiptarët e kësaj treve në Malin e Zi shpresojnë që të vazhdojnë të jene të bashkuar dhe të bëjnë të mundur që situata ekonomiko sociale e kësaj zone të ndryshojë për mirë./TCH