Sot në Nju Jork do të mbahet seanca e Këshillit të Sigurimit të Kombeve të Bashkuara, ku do të diskutohet për situatën politike në Bosnje dhe Hercegovinë.

Në seancën e sotme do të raportojë Përfaqësuesi i Lartë për Bosnjë dhe Hercegovinë, Christian Schmidt.

Qeveria e entitetit serb të Bosnjës dhe Hercegovinës e quajtur Republika Serbe tashmë ka dërguar “raportin” e saj, në të cilin pretendohet se udhëheqja e RS-së “vepron me qëllim të ruajtjes së Marrëveshjes së Paqes të Dejtonit, të cilën Republika Serbe e respekton plotësisht, si dhe Kushtetutën e BeH, e cila është pjesë përbërëse e saj”.

Në raportin e kësaj qeverie të Dodikut, në mes tjerash pretendohet se “në vend që të respektohet Marrëveshja e Paqes e Dejtonit, fryma e saj u interpretua në mënyrë arbitrare, me imponimin e vendimeve nga të huajt, veçanërisht nga Christian Schmidt”, të cilin e quajnë “të paligjshëm”.

Aty gjithashtu pretendohet se “procedurat dhe vendimet e miratuara në Kuvend me qëllim të kthimit të kompetencave që i takojnë Republikës Serbe sipas Kushtetutës ishin përgjigje ndaj përpjekjes së “paligjshme” për dënimin me burg të kryetarit të RS Milorad Dodik dhe për rrënimin e institucioneve të Republikës Serbe”.