Driton Çaushi, nënkryetar i parë i Lëvizjes Vetëvendosje në konferencën e thirrur për media, ka folur për marrëveshjen e fundit të arritur në Bruksel, ku ka thënë se qeverisja Mustafa po e ndjek rrugën e njëjtë sikur të Hashim Thaçit. Sipas tij, me marrëveshjen e fundit janë nënçmuar qytetarët e Kosovës dhe kjo dëshmon se  qeveritarët kanë hequr dorë nga sovraniteti i Kosovës.

“Kjo marrëveshje quhet për lëvizje të lirë por në thelb nuk ka të bëjë me një gjë të tillë. Kjo marrëveshje po i nënçmon qytetarët e Kosovës, po i dëmton edhe në aspektin financiar duke paguar taksa tepër të padrejta. Qeveritarët po premtojnë se nuk do të ketë lëshime për asociacionin e komunave por duke pasur parasysh lëshimet e tjera që i kanë bërë kjo nënkupton se kjo qeveri nuk i ka mbajt premtimet”, tha Çaushi.

Ai tha se VV-ja do t`i kundërshtojë këto marrëveshje, sepse, sipas tij, mund të ndodhë që në fund të muajit të arrihet ndonjë marrëveshje për asociacionin e komuna, e për këtë , VV nuk i përjashton  protestat.

“Me këtë rast mund të themi se në fund të muajit do të mund të ketë ndonjë marrëveshje për asociacionin e komunave. Ne do ti kundërshtojmë këto marrëveshje. Protesta do të jetë një nga format me të cilat do të kundërshtojmë do të jemi radikal për marrëveshjen e asociacionit të komunave me shumicë serbe”, tha më tej Çaushi./arbresh.info