Anëtari i PDK’së Abelard Tahiri thotë se fitorja e Vetëvendosjes në Podujevë nuk nënkupton se kjo parti po rritet në nivel vendi. Ai thotë se Shpejtim Bulliqi i VV’së ka fituar në këtë komunë pasi qytetarët kanë dashur që nga pushteti të largojnë Agim Veliun.

“Dallon shumë gara lokale me zgjedhjet nacionale, e para. E dyta, në dy palë zgjedhjet e fundit më 2017 dhe 2019 ne në Podujevë nuk kemi shënuar një rezultat të mirë”, tha Tahiri në Pressing.

Deputeti i PDK’së ka pranuar se votues të kësaj partie votuan VV’në pasi e panë që vetëm në këtë mënyrë nga pushteti do të ikte Veliu i LDK’së

“Ne po e shohim si mundësi të artë me e çrrënjosë këtë klikë prej komune edhe pse e dinë që Bulliqi është një brum i tyre po të paktën me një ekip të re e cila do ta ndryshojë kursin e qeverisjes”, sqaroi ai.

“Pra njerëzit duke përfshirë edhe votues tanët, edhe të tyre, të gjithëve e kanë votu largimin e një strukture nga komuna. Nuk e kanë votuar ardhjen e z.Bulliqi si një ndryshim sepse ai ka qenë për dy mandate drejtor i Arsimit në komunë”, theksoi Tahiri.