Ardhja e mërgimtarëve në Kosovë ka shtuar fluksin e automjeteve në pikat kufitare.

Gjatë ditës së sotme është shënuar një rritje e ndjeshme e qarkullimit në disa pika kufitare për hyrje në Kosovë. Pritjet më të gjata po regjistrohen në pikën kufitare te Dheu i Bardhë, ku qytetarët po presin deri në tre orë (rreth 200 minuta), ndërsa kolona e automjeteve ka arritur në 500 metra.

Sipas të dhënave të përditësuara në orën 14:29, vonesa të konsiderueshme ka edhe në pikën kufitare Muçibabë, me rreth 40 minuta pritje dhe kolonë afërsisht 150 metra për automjetet që hyjnë në territorin e Kosovës.

Në pikat tjera kufitare situata paraqitet më e qetë. Në Bërnjak, koha e pritjes është 15–20 minuta, ndërsa në Merdarë dhe Kullë lëvizja është më e shpejtë, me pritje që variojnë nga 5 deri në 10 minuta.

Pikat kufitare me më pak ngarkesë dhe pritje minimale – jo më shumë se 5 minuta dhe pa kolona – janë: Qafë e Morinës, Qafë e Prushit, Hani i Elezit, Mutivodë dhe Stançiq.