Federata e Sindikatave të Shëndetësisë së Kosovës kanë paralajmëruar trazira sociale nëse nuk merren parasysh kërkesat e tyre në Ligjin për pagat në sektorin publik.

Ata thonë se nuk do të pranojnë asnjë koeficient në dëm të punëtorëve shëndetësorë.

“Është momenti i fundit që të reflektoni në mënyrë të sinqertë dhe transparente, përndryshe, trazirat sociale janë të pashmangshme”, thuhet në reagimin e tyre”, shkruan arbresh.info.

Komunikata e plotë:

Të nderuar punëtorë shëndetësorë, meqë këto ditë po qarkullojnë draftet e ndryshme dhe reagime të ndryshme për Ligjin e Pagave, Federata e Sindikatave të Shëndetësisë së Kosovës ju njofton se ne:

Nuk kemi marr pjesë në hartimin e draftit të Ligjit të Pagave dhe

Nuk jemi në dijeni për vlerën e koeficientit

Andaj çdo reagim nga grupet e caktuara mund të shkaktojë amulli dhe dëmtim të procesit për Ligjin e Pagave.

Federata e Sindikatave të Shëndetësisë së Kosovës i bën apel Qeverisë së Republikës së Kosovës që sa më parë të publikojë draft-Ligjin e Pagave dhe vlerën e koeficientit me qëllim të shmangies së keqkuptimeve të cilat mund ta dëmtojnë këtë proces.

FSSHK i siguron të gjithë punëtorët shëndetësor se në asnjë moment nuk do të pranojnë asnjë draft e asnjë koeficient që mund të shkoj në dëm të punëtorëve shëndetësor.

Në fund thirrje publike Qeverisë së Republikës së Kosovës,

Është momenti i fundit që të reflektoni në mënyrë të sinqertë dhe transparente, përndryshe, trazirat sociale janë të pashmangshme.

Me respekt,

Dr. Blerim Syla

Kryetar i FSSHK-së