Kosova dhe Shqipëria së shpejti do të jenë të detyruara që të rikthejnë kontrollet e dyfishta kufitare. Kjo me kërkesën e Komisionit Evropian me qëllim të parandalimit të krimit ndërkufitar.

Pas aplikimit sezonal në stinën e verës, kontrolli në të dy pikat kufitare gjatë kalimit të kufirit ishte hequr përfundimisht në korrik të 2011-ës në bazë të marrëveshjes dypalëshe “Një ndalesë, një kontroll”.

Marrëveshja në lidhje me procedurat e përbashkëta të kontrollit në pikëkalimet kufitare Morinë-Vermicë, Qafë-Prush dhe Qafë-Morinë u zbatua pas instalimit të sistemit TIMS edhe në pikën kufitare kosovare të Vërmicës.

Reduktimi i kontrolleve ndikoi në pakësimin e radhëve të automjeteve në kufirin mes dy vendeve, sidomos gjatë stinës së verës.

Kurse tash, kërkesa e Komisionit Europian lidhet me procesin e liberalizimit të vizave.

Ministri për Integrime Evropiane, Bekim Çollaku ka thënë për KosovaPress tha se ky rikthim i kontrollit është bërë në kuadër të luftës kundër krimit të organizuar dhe dukurive tjera negative që zhvillohen në brezin kufitar.