Organizatat e dala nga lufta në Kosovë kanë reaguar sërish lidhur me vizitën e paralajmëruar të Kryetares së Dhomave të Specializuara, Ekaterina Trendafilova, duke e quajtur atë të papranueshme dhe një fyerje të rëndë për ata që sakrifikuan për lirinë e Kosovës.

Organizata e Veteranëve të Luftës së Ushtrisë Çlirimtare të Kosovës (OVL-UÇK) dhe disa organizata të tjera kanë shprehur shqetësimin se vizita e Trendafilovës është një tentativë për të shmangur llogaridhënien dhe një përpjekje për të ndjekur një agjendë të njëanshme politike.

Sipas organizatave, kjo qasje arrogante dhe fyese s’është tjetër veçse vazhdim i padrejtësisë “që po u bëhet krerëve të UÇK-së në Hagë”.

“E njëjta gjykatë që heshti për krimet serbe mbi civilët shqiptarë, sot vjen në Kosovë si “autoritet drejtësie”, por nuk ka guxim të përballet me opinionin publik. Kjo është hipokrizi e pastër! Ne, OVL, SHIL dhe SHFD, ritheksojmë kundërshtimin tonë të plotë dhe të palëkundur ndaj kësaj vizite. Kërkojmë nga institucionet e Kosovës që të mos bëhen pjesë e kësaj fasade, dhe i ftojmë të gjithë qytetarët, shoqatat e dala nga lufta dhe mediat e pavarura, të qëndrojnë në krah të së vërtetës dhe sakrificës sonë të përbashkët”, thuhet në njoftim./Arbresh.info