Për 18 vjet në Kosovë janë pastruar nga minat mbi 50 milionë metra katrorë, ndërsa janë gjetur dhe asgjësuar rreth 88 mijë mjete të pashpërthyera.

Zëvendëskomandanti i Kompanisë së Deminimit të FSK-së, kapiten Gëzim Sada, thotë për Radio Kosovën se si pasojë e këtyre mjeteve shpërthyese nga vitit 1999 deri në 2018 kanë humbur jetën mbi 100 persona, ndërsa mbi 400 të tjerë janë lënduar.

Ani pse kanë kaluar 18 vjet nga përfundimi i luftës së fundit në Kosovë ende ka hapësira me mjete të rrezikshme të pashpërthyera. Janë rreth 49 fusha të minuara të cilat po vënë në aksion çdo ditë kompaninë e deminimit për t’i larguar ato.

Zëvendëskomandanti i Kompanisë së Deminimit të FSK-së, kapiten Gëzim Sada, sqaron se tani kanë mbetur edhe 49 fusha të minuara, si dhe 49 të tjera të cilat gjatë luftës kanë qenë cak i bombardimeve nga forcat e NATO-s.

Kryesisht janë rreth brezit kufitar. Por ka edhe në ndonjë komunë por jo afër qyteteve. Në kuadër të ministrisë është edhe qendra koordinuese që menaxhon gjithë procesin e dominimit, ku prioritet është që deri në vitin 2024-2025 do të pastrohen të gjitha fushat e rrezikshme në Kosovë.
Kapiten Sada shprehet se parqet e qyteteve janë të pastruara tërësisht dhe se nuk paraqesin rrezik për qytetarët. Ndërkaq në ‘’Parkun e Lirisë’’ në Ferizaj vazhdohet të punohet dhe shpreson që vitin që vjen ky park të jetë i sigurt për qytetarët. Sada thotë se për ta bërë gjithë këtë punë sa humane aq edhe të rrezikshme pjesëtarët e Kompanisë së Deminimit mbajnë trajnime të rregullta

Pjesëtarët tanë kanë trajnime në pastrimin e fushave të minuara,kontaminuara ,shkatërrimin e mjeteve eksplozive,për vetëdijesim, dhe kemi trajnime për misionet paqeruajtëse.