Deputetja e Lëvizjes Vetëvendosje, Mimoza Kusari-Lila, ka reaguar pas akuzave për shkelje të rregullores në Kuvend, duke theksuar se nuk ka pasur asnjë shkelje në kërkesën për ndryshimin e orarit të mbledhjeve të Kuvendit.

Kusari-Lila tha se kërkesa për ndryshimin e orarit të mbledhjeve ishte propozim të hapur për konsultim ndërmjet grupeve parlamentare dhe jo për ndonjë veprim të njëanshëm apo në kundërshtim me rregulloren.

“Sot, siç e patë, seanca ka filluar me një kërkesë për konsultim nga ana e kryesuesit që, me një dakordim, të shmangim rregulloren dhe të takohemi më rrallë, meqë 48 orëshi i cili tashmë brenda këtij muaji është duke u përsëritur, po shihet që nuk ka asnjë rezultat. Pavarësisht se partitë e opozitës nuk kanë pasur asnjë reflektim për përgjegjësinë e tyre për zhbllokimin e punës së Kuvendit,” tha Kusari-Lila.

Ajo theksoi se propozimi për ndryshimin e orarit nuk u mbështet dhe nuk u realizua, duke shtuar se nuk ka asnjë shkelje në këtë proces.

“U akuzuam edhe njëherë për shkelje, por ai ishte një propozim për dakordim, i cili nuk u mbështet dhe nuk u realizua. Rrjedhimisht, nuk ka asgjë që mund të deklarohet si shkelje, përveçse një përpjekje për t’i kthyer në një orar tjetër këto takime,” përfundoi Kusari-Lila./rtk