Kryeministri në detyrë dhe lideri i Lëvizjes Vetëvendosje, Albin Kurti, është përgjigjur shkurt sot lidhur me pritjet për një përgjigje nga Lidhja Demokratike e Kosovës (LDK) pas ftesës zyrtare që u dërgua më 5 maj për formimin e një koalicioni qeverisës.

Gjatë një vizite në Gjilan, ku mori pjesë në ceremoninë e vendosjes së gurthemelit për objektet e banimit të përballueshëm dhe social, Kurti u pyet nga gazetarët nëse pret përgjigje pozitive nga LDK. Megjithatë, ai nuk dha një përgjigje të drejtpërdrejtë, duke theksuar se:

“Ato janë çështje të Prishtinës, këtu jemi për banim”, tha ai shkurt për Art media, pas përfundimit të ceremonisë.

Më tej, Kurti u pyet nëse opozita po e zvarrit konstituimin e institucioneve nga frika se pas kësaj, Vetëvendosje do të formojë qeverinë. Edhe këtë herë, ai zgjodhi një përgjigje me ironi:

“Nuk është kollaj të analizojmë frikën e opozitës, edhe kjo është punë për analistë. Unë kryeministër, vazhdojmë tutje ose VVazhdojmë tutje”, u shpreh Kurti, duke qeshur.

Ftesa për koalicion e dërguar nga Kurti më 5 maj në adresë të kryetarit të LDK-së, Lumir Abdixhiku, ende nuk ka marrë përgjigje zyrtare nga kjo e fundit.