Kryeministri në detyrë, Albin Kurti, e ka cilësuar si shqetësuese rënien e Kosovës në Indeksin e Lirisë së Shtypit për vitin 2025, por theksoi se përgjegjësia për këtë rënie nuk i takon qeverisë, por vetë mediave.

Në fjalën e tij gjatë mbledhjes së Këshillit të Përgjithshëm të Lëvizjes Vetëvendosje, Kurti komentoi për herë të parë raportin e organizatës “Reporterët pa Kufij”, sipas të cilit Kosova ka humbur 24 pozita dhe është renditur në vendin e 99-të nga 180 shtete, duke shënuar një rënie të ndjeshme.

“Është për keqardhje rënia e thellë në indeksin e medias. Në Kosovë ka liri të shprehjes dhe liri të mediave, jam dëshmitar i kësaj nga përvoja dhe jeta këtu. Rënia në indeks është një kontradiktë me realitetin që jetojmë dhe këtë kontradiktë duhet ta përmirësojnë vetë mediat”, u shpreh Kurti.

Ai theksoi se, ndryshe nga qeveritë e kaluara, ekipi i tij qeverisës nuk ka asnjë pronar mediash dhe raportet e pushtetit me median janë të distancuara dhe profesionale.

Ky koment i Kurtit erdhi pas kritikave që ka marrë Kosova për rënien e konsiderueshme në indeksin e lirisë së shtypit./Arbresh.info