Qindra qytetarë të rajonit të Drenicës kanë bllokuar rrugët që nga orët e mëngjesit për t’ia pamundësuar ardhjen e presidentit serb Aleksandar Vuçiq në fshatin Banjë të Skenderajt, i banuar nga komuniteti serb.

Presidenti serb e kishte në agjendë të vizitonte këtë fshat që gjendet në rajonin e Drenicës.

Por, qytetarë të shumtë të Skenderajt kanë filluar mobilizimin që nga mbrëmë për të pamundësuar këtë vizitë të presidentit serb.

Ata kanë bllokuar rrugën që çon në Banjë me dru e goma automjetesh, të cilave edhe ua kanë vënë flakën.

Po ashtu, me traktorë, kamionë e vetura janë bllokuar edhe rrugë të tjera që çojnë drejt Banjës.

Me protestuesit ndërkohë është solidarizuar edhe kryetari i Skenderajt, Bekim Jashari.

Në një prononcim për media, Jashari ka thënë tha se Vuçiq nuk mund të vijë në Drenicë pa kërkuar falje për viktimat dhe masakrat e kryera nga forcat serbe në vitet 1998/99.

Protestës, ndërkohë, i është bashkëngjitur edhe kryetari i Komunës së Drenasit, Ramiz Lladrovci, deputetja e Kuvendit të Kosovës, Ganimete Musliu, ministri Bedri Hamza, e të tjerë.

Me gjithë këto bllokada rrugësh e protesta, Vuçiq ka bërë përpjekje të niset për të realizuar vizitën, por është ndaluar nga Policia e Kosovës.

Pas pamundësisë që të shkojë në këtë fshat, ai u është drejtuar përmes telefonit banorëve lokalë.

Këto janë disa fotografi nga protesta e sotme./kallxo.com/