KQZ me të dhëna për zgjedhjet lokale: Deri sot, 1402 votues me postë

14:01 | 4 Gusht 2025
E.G

Deri më tani 1402 personave u është aprovuar aplikimi për votim me postë për zgjedhjet lokale që do të mbahet më 12 tetor të këtij viti.

Anëtarët e Komisionit Qendror të Zgjedhjeve kanë shpalosur të dhënat e përgatitjes së procesit zgjedhor, teksa kanë informuar që 569 qytetarëve të tjerë për votim me postë u janë refuzuar aplikimet, sipas të dhënave deri më sot.

Sipas raportit informues, është duke u zhvilluar periudha për ndërrimin e Qendrës së Votimit brenda komunës dhe që nga fillimi i saj më 28 qershor dhe deri më 4 gusht 2025, janë pranuar 1,500 kërkesa, prej të cilave 1,409 janë aprovuar, ndërkaq 91 të tjera janë refuzuar për shkak se nuk kanë bashkangjitur fotografinë e tyre duke mbajtur në dorë dokumentin identifikues.