Kryetari i Kuvendit, Glauk Konjufca, ka pritur në takim sot të dërguarin e ShBA-ve për Ballkanin Perëndimor, Gabriel Escobar.

Sipas Konjufcës, në këtë takim është diskutuar për dialogun, me theks të veçantë në propozimin evropian për normalizim të raporteve Kosovë – Serbi.

“Diskutuam për zhvillimet aktuale politike në vend, rajon dhe më gjerë, procesin e dialogut dhe hapat e mëtejmë, me fokus të veçantë propozimin e BE-së për normalizim të marrëdhënieve ndërmjet Republikës së Kosovës dhe Serbisë”, ka shkruar Konjufca.

Kryeparlamentari në Facebook ka theksuar se fokusi i njohjes gjithmonë është njohja e plotë dhe marrëveshjet që arrihen, duhet të respektojnë sovranitetin e vendit, integritetin territorial dhe Kushtetutën.

“Ritheksova se asnjëherë nuk do ta humbim fokusin nga njohja e plotë, dhe se çfarëdo marrëveshje që mund të arrihet në procesin e dialogut me Serbinë duhet të respektojë në plotni sovranitetin, integritetin territorial dhe rendin kushtetues të Republikës së Kosovës”, ka shkruar ai.

Tutje, ai është shprehur falënderues ndaj Escobar për angazhimin e tij dhe të ShBA-ve në dialog./arbresh.info