Kërkesa e Serbisë për ekstradimin e z.Haradinaj, për krimet e supozuara në Kosovë, akuza që janë trajtuar nga Tribunali i Hagës, është jo vetëm sulm ndaj Ramushit, por edhe sulm ndaj Kosovës dhe rendit kushtetues të saj.

Kështu ka thënë avokati i Haradinajt, Arianit Koci, teksa ka shtuar se, për më tepër, përpjekjet e Serbisë për ndikim në drejtësinë franceze, prej momentit të ndaljes së z. Haradinaj, nuk kanë të ndalur.

“Pse duhet në një çështje juridike, të deklarohen në kontinuitet, Ministrja e Drejtësisë, Kryeministri dhe Ministri i Punëve të Jashtme i Serbisë”, ka pyetur Koci.

Avokati ka thënë se “është koha e fundit, t’i mbrojmë interesat e vendit”.

“Politikanët në pushtet nuk guxojnë të sillen thuajse asgjë nuk ka ndodhur. Kjo situatë duhet të shërbejë si bazë për vendosjen e një qasje të re në dialogun me Serbinë. Defetizmi apo kryeneçësia nuk janë zgjidhje”, ka thënë Koci, përcjell Koha.net. “Platforma duhet të jetë e qartë dhe në shërbim te interesave të shtetit dhe të gjithë qytetarëve të Kosovës”, ka shtuar më pas.